ສາເຫດຍ້ອນການຫັນເປັນທັນສະໄໝໃນການຄຸ້ມຄອງງົບປະມານແຫ່ງລັດເປັນປັດໄຈສໍາຄັນປິ່ນ ອ້ອມໃນການຄຸ້ມຄອງລາຍຮັບປະຕິບັດໄດ້ເພີ່ມຂຶ້ນ (ເປັນຕົ້ນວິຊາກັບດ່ານເພີ່ມຂຶ້ນ 108 ຕື້, ລາຍຮັບວິຊາການ 401 ຕື້ກີບ, ຄ່າທໍານຽມ 27 ຕື້ກີບ ແລະ ຄ່າບິນຜ່ານ 420 ຕື້ກີບ); ສໍາລັບລາຍຮັບແຮ່ທາດເພີ່ມຂຶ້ນແມ່ນໄດ້ຈາກແຮ່ຄໍາເປັນຕົ້ນຕໍ ເປັນເງິນຕາຕ່າງປະເທດ 107 ລ້ານໂດລາ, ເປັນ ເງິນ 2,253 ຕື້ກີບ (ໂດຍສະເພາະອາກອນກຳໄລ ແລະ ຄ່າຊັບພະຍາກອນທໍາມະຊາດ), ກວມເອົາ 4.8% ຂອງ ລາຍຮັບ 10 ເດືອນ ຍ້ອນມີການປັບອັດຕາຄ່າຊັບພະຍາກອນທຳມະຊາດຈາກ 7% ເປັນ 12% (ປະລິມານການ ສົ່ງອອກ 10 ເດືອນ 2023 ຈໍານວນ 74,251 ອອນ, ປີ 2024 ຈໍານວນ 69,521 ອອນ, ຫຼຸດລົງ 4,730 ອອນ) ແລະ ລາຄາຕະຫຼາດໂລກຈາກແຮ່ຄໍາເພີ່ມຂຶ້ນ 30% (ກວມເອົາ 60% ແມ່ນແຮ່ຄໍາ, ສ່ວນອີກ 40% ແມ່ນຄ່າ ພາກຫຼວງ, ຄ່າສໍາປະທານ ແລະ ແຮ່ອື່ນໆ) ເຊິ່ງການເພີ່ມຂຶ້ນຂອງລາຍຮັບດັ່ງກ່າວ ບໍ່ແມ່ນຈາກການຜິດດ່ຽງ ຂອງອັດຕາແລກປ່ຽນ, ໃນເວລາສ້າງແຜນອັດຕາແລກປ່ຽນແມ່ນ 22,500 ກີບ/$, ອັດຕາແລກປ່ຽນສະເລ່ຍ 21,465 ກີບ/$). ສັງລວມແລ້ວຄ່າສະເລ່ຍຜິດດ່ຽງບໍ່ມີຜົນຫຼາຍຕໍ່ກັບການເພີ່ມຂຶ້ນຂອງລາຍຮັບ.

ຜ່ານການວິເຄາະດ້ານໂຄງສ້າງການຈັດເກັບລາຍຮັບໃນ 10 ເດືອນ ປີ 2024 ເຫັນວ່າ: ລາຍຮັບງົບປະມານໄດ້ຈາກຖານໝັ້ນຄົງ, ຍືນຍົງ (35,420 ຕື້ກີບ) ກວມ 77% ຂອງລາຍຮັບທັງໝົດ ໃນນັ້ນ ລາຍຮັບຈາກພາສີ-ອາກອນ 31,450 ຕື້ກີບ, ກວມເອົາ 68%, ລາຍຮັບບໍ່ແມ່ນພາສີ-ອາກອນ 3,970 ຕື້ກີບ, ກວມເອົາ 9% ທຽບໃສ່ລາຍຮັບທັງໝົດ. ທິດທາງແຜນການໃນຕໍ່ໜ້າ ຈະສຸມໃສ່ການເຊື່ອມໂຍງຂໍ້ມູນກັບຂະແໜງການ ພະລັງງານ ແລະ ບໍ່ແຮ່ ເຊິ່ງຈະສາມາດເກັບລາຍຮັບໄດ້ເພີ່ມຂຶ້ນ;

ສ່ວນລາຍຮັບງົບປະມານໄດ້ຈາກຖານບໍ່ຍືນຍົງ ເຊັ່ນ: ລາຍຮັບຈາກແຮ່ທາດ ແລະ ຄ່າປັບໃໝ (7,754 ຕື້ກີບ) ກວມເອົາພຽງແຕ່ 17% ແລະ ລາຍຮັບຈາກການຊ່ວຍເຫລືອລ້າປະຕິບັດໄດ້ 6% ຂອງລາຍຮັບທັງໝົດ. ສໍາລັບແຫຼ່ງລາຍຮັບງົບປະມານທີ່ຈະມາທົດແທນລາຍຮັບທີ່ບໍ່ຍືນຍົງ ແມ່ນຈະສຸມໃສ່ເກັບລາຍຮັບຈາກຖານທີ່ມີ ດ້ວຍການໃຊ້ບັນດາມາດຕະການເປັນຕົ້ນ: ຫັນການເກັບຄ່າທໍານຽມ ແລະ ຄ່າບໍລິການ ເປັນທັນສະໄໝລວມສູນ ກັບທຸກຂະແໜງການ ທັງສູນກາງ ແລະ ທ້ອງຖິ່ນ, ອາກອນທີ່ດິນ, ຄ່າທໍານຽມທາງ, ການເກັບອາກອນລາຍໄດ້ຈາກ ການຊື້-ຂາຍອອນລາຍ ແລະ ອັດຊ່ອງວ່າງການຮົ່ວໄຫຼງົບປະມານແຫ່ງລັດ.