ວັນທີ 26 ສິງຫາ ຂອງທຸກປີ ຖືກกำหนดໃຫ້ເປັນ ວັນໝາໂລກ (International Dog Day) ເຊິ່ງບໍ່ພຽງແຕ່ເປັນມື້ສຳລັບການສະຫຼອງຄວາມໜ້າຮັກຂອງໝູ່ເພື່ອນສີ່ຂາເທົ່ານັ້ນ, ແຕ່ຍັງເປັນມື້ທີ່ເຕືອນໃຫ້ມະນຸດເຮົາລະນຶກເຖິງຄວາມສຳຄັນ, ຄວາມຊື່ສັດ, ແລະ ບົດບາດອັນມີຄຸນຄ່າຂອງໝາທີ່ມີຕໍ່ຊີວິດຂອງຄົນເຮົາ ແລະ ສັງຄົມ.

ໝາໄດ້ຮັບການຂະໜານນາມວ່າເປັນ “ເພື່ອນທີ່ດີທີ່ສຸດຂອງມະນຸດ” (Man’s Best Friend) ມາຕັ້ງແຕ່ຕາບໃດດົນນານ. ພວກມັນບໍ່ພຽງແຕ່ເປັນສັດລ້ຽງທີ່ໃຫ້ຄວາມເພີດເພີນເທົ່ານັ້ນ, ແຕ່ຍັງເປັນສ່ວນໜຶ່ງຂອງຄອບຄົວທີ່ມອບຄວາມຮັກຄວາມຜູກພັນແບບບໍ່ມີເງື່ອນໄຂ. ບໍ່ວ່າເຈົ້າຈະມີວັນທີ່ດີ ຫຼື ວັນທີ່ຮ້າຍແຮງສຳ່ໃດ ໝາພ້ອມທີ່ຈະຢູ່ຄຽງຂ້າງ, ໃຫ້ກຳລັງໃຈ ແລະ ຕ້ອນຮັບເຮົາກັບບ້ານດ້ວຍຫາງທີ່ແກວ່ງໄປມາສະແດງເຖິງຄວາມດີໃຈສະເໝີ.

ນອກຈາກຄວາມເປັນເພື່ອນແລ້ວ ໝາຍັງມີຄວາມສາມາດພິເສດທີ່ຊ່ວຍເຫຼືອມະນຸດໃນຫຼາຍໆດ້ານ ເຊັ່ນ:

ໝາຊ່ວຍເຫຼືອຄົນພິການ: ເຊັ່ນ ໝາສຳຫຼັບຄົນຕາບອດ ຫຼື ໝາຊ່ວຍເຫຼືອຜູ້ມີອາການທາງຮ່າງກາຍ.

ໝາປະຕິບັດງານ: ໝາຕຳຫຼວດ ແລະ ໝາທະຫານ ທີ່ຊ່ວຍໃນການກວດຄົ້ນ, ຢາເສບຕິດ, ລະເບີດ ຫຼື ຊອກຫາຜູ້ປະສົບໄພພິບັດ.

ໝາບຳບັດ: ຊ່ວຍຟື້ນຟູຈິດໃຈໃຫ້ກັບຜູ້ປ່ວຍ, ຜູ້ສູງອາຍຸ ຫຼື ເດັກນ້ອຍທີ່ມີອາການທາງຈິດຕະສາດ.

ບັນຫາ ແລະ ການປົກປ້ອງສິດທິສັດ
ເຖິງວ່າໝາຈະໃຫ້ຄຸນປະໂຫຍດ ແລະ ຄວາມຮັກມາກມາຍ ແຕ່ກໍຍັງມີໝາຈຳນວນຫຼາຍທີ່ຕ້ອງປະເຊີນກັບຄວາມໂຫດຮ້າຍ, ການຖືກທອດຖິ້ງ, ຖືກທາລຸນ ຫຼື กลາຍເປັນໝາຈອນຈັດ. ວັນໝາໂລກຈຶ່ງເປັນໂອກາດອັນດີທີ່ຈະ:

ຊຸກຍູ້ການຮັບລ້ຽງ (Adoption): ໂຄສະນາໃຫ້ຄົນຫັນມາຮັບເອົາໝາຈາກສູນพักພີງມາລ້ຽງ ແທນການຊື້ພັນລາຄາແພງ ພາຍໃຕ້ຄຳຂວັນທີ່ວ່າ “ຢ່າຊື້ ແຕ່ຈົ່ງຮັບລ້ຽງ”.

ສ້າງຈິດສຳນຶກ: ໃຫ້ຄວາມຮູ້ກ່ຽວກັບການລ້ຽງດູຢ່າງຮັບຜິດຊອບ ເຊັ່ນ ການສັກຢາປ້ອງກັນພະຍາດ, ການທຳໝັນ ແລະ ການໃຫ້ການດູແລທີ່ເໝາະສົມ.

ວັນໝາໂລກ ບໍ່ແມ່ນພຽງແຕ່ມື້ສຳລັບການໂພສຮູບໝາໜ້າຮັກລົງສື່ສັງຄົມອອນລາຍເທົ່ານັ້ນ, ແຕ່ມັນຄືສັນຍາລັກຂອງຄວາມເມດຕາທີ່ມະນຸດຄວນມີຕໍ່ສັດໂລກ. ໃຫ້ເຮົາຮ່ວມກັນເປັນກະບອກສຽງ, ປົກປ້ອງ ແລະ ມອບຄວາມຮັກໃຫ້ແກ່ໝູ່ເພື່ອນສີ່ຂາເຫຼົ່ານີ້ ເພາະສຳລັບພວກມັນແລ້ວ… ໂລກທັງໃບຂອງພວກມັນ ກໍຄືມະນຸດຢ່າງພວກເຮົານີ້ເອງ.